[99]
Fâ`ilâtün Fâ`ilâtün Fâ`ilâtün Fâ`ilün
1 Ol büt-i gûyâ kaçan kim çîn-i ebrû gösterür
Dillere emvâc-ı bahr-ı hüsn-i dil-cû gösterür
2 Çeşm-i sehhârı `acebdür sayd-ı erbâb-ı dile
Şerze-şîr-i gamzeyi sihr ider âhû gösterür
3 `Âlemi dil-beste-i zünnâr-ı `ışk eyler kaçan
Ol sanem tarf-ı külehde târ-ı gîsû gösterür
4 Cebhesinde pîç-tâb-ı nâzı olsa cilve-ger
Va`deler ümmîd-dâr-ı vaslına rû gösterür
5 Biñ dil-i âzâdeye sûz-ı firîb-endâz olur
Her kaçan tarf-ı nigâh-ı çeşm-i câdû gösterür
6 Her kademde niçe biñ cân u dil olur hâksâr
Ol perî kim mest olur reftâr-ı dil-cû gösterür
7 Her ki cismin Nâmî-âsâ feyz-yâb-ı `ışk ider
Âteş-i dûzah şerâre rişte-i mû gösterür
Yard. Doç. Dr. Ahmet YENİKALE AHMET NÂMÎ DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ
