O tıflı gör ne kıyâmet nigâr olur giderek
Hırâmı düşmen-i sabr u karâr olur giderek
Koyun şarâb-ı mahabbetle kendüden gitsin
Zaman gelir bu gönül hûş-yâr olur giderek
Tarîk-ı aşkda pâ-mâl-i sâlikân ol kim
Bir iki nakş-ı kadem reh-güzâr olur giderek
Hayâl-i serv-i kadinle kalır giderse bu eşk
Fezâ-yı sînede bir cûybâr olur giderek
Geçen bu duzah-ı endûhdan selâmetle
Behişte her kademinde düçâr olur giderek
Olursa pey-rev o çâpük-süvâr-ı nazma Nedîm
Semend-i tab‘ı aceb râhvâr olur giderek
Prof. Dr Muhsin Macit, Nedim Divanı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ, KÜLTÜR ESERLERİ 511
