81
mefâ‘ilün fe‘ilâtün mefâ‘ilün fe‘ilün
1 O şeh-süvâr ile ağyâr hem-‘inân geçiyor
Elemde olma göñül yahşi vü yaman geçiyor
2 Açarsa revzen-i hayret-fezâyı merdüm-i çeşm
‘Aceb degül yine âlây-ı dil-berân geçiyor
3 Bir ıztırâba düşer hasretüñle haste göñül
Gören sanur o sitem-dîdeyi hemân geçiyor
4 Egerçi nüsha-i mihr ü vefâ perîşândur
Hele mahall-i temennâ-yı ‘âşıkân geçiyor
5 Gurûra düşme eyâ şâh-ı milket-i ‘ısmet
Benüm senüñle de göñlümden imtihân geçiyor
6 Bu demde geçmese nakd-i sirişk-i hûn-alûd
Kayırmaz iki gözüm yine bir zamân geçiyor
7 Ne nakş geçmede ruhsâr-ı yâra neş’e-i mey
Gehi karanfül ü geh gül geh ergavân geçiyor
8 Henûz mazhar-ı lutf olmaduñ sen ey Kâmî
Esîr-i tûl-i emelsin o nev-civân geçiyor
Yrd. Doç. Dr. Gülgün Erişen YAZICI,, Edirneli Kâmî ve Divanının Tenkitli Metni, (Basılmamış doktora tezi), A. Ü. Sosyal Bilimler Enstitüsü , Ankara, 1998,- https://ekitap.kulturturizm.gov.tr/Eklenti/10619,kamipdf.pdf?0
