44
(Fâilâtün Fâilâtün Fâilâtün Fâilün)
1 Nûş-ı câm-ı bâdeden âsâyiş-i tendir murâd
Revzen-i gam-hâneye bir câm-ı rûşendir murâd
2 Şevk-i ruhsârınla sâyende benim serv-i kadim
Dâg-ber-dâg olmadan dil tarh-ı gülşendir murâd
3 Dilde meydir bâis-i germiyyet-i bezm-i visâl
Germî-i germâbeye çün tâb-ı külhandır murâd
4 Muktezâ-yı ışk eşk ü nâledir bülbül-sıfat
Bir güle dil-bestelikden âh u şîvendir murâd
5 Yâ diyâr-ı vadede yâ milket-i himmetdedir
Çok yorulma Haşmetâ semt-i ademdendir murâd
Haz.: Dr. Mehmet Arslan-İ. Hakkı Aksoyak, Haşmet Haşmet Külliyatı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3199 KÜLTÜR ESERLERİ
