Fe‘ilâtün Fe‘ilâtün Fe‘ilâtün Fe‘ilün
 
1 Nigehî ‘arbede-cû cünbüş-i müjgânı ile
Çekişür çeşm-i siyeh mesti girîbânı ile
 
2 Çoklarun çâk-i girîbânına olurdı sebeb
Beni pâ-bûse şerîk eylese dâmânı ile
 
3 Kalmadı hˇâhişimüz meyve-i vasla cânâ
Bizi seyr itdi gamun ni‘met-i elvânı ile
                                                           
4 Neş’esi câm-ı meyün şâh ü gedâya birdür
 Hat-ı peymâne yazılmaz hat-ı dîvânı ile
 
5 Şerm-i hüsn olmasa hurşîde ‘inân-gîr-i heves
Götürür şebnemi bâlâya gülistânı ile
 
6 Sormadı hâlini bir kerre o şûh Âgâhun
Âşinâ eylemedi derdini dermânı ile
 
Dr. ŞERİFE AKPINAR’ ÂGÂH (Semerkândî-i Âmidî) DÎVÂN, KÜLTÜR VE TURİZM BAKANLIĞI KÜLTÜR ESERLERİ 502  2012,