mefâ’îlün mefâ’îlün mefâ’îlün mefâ’îlün
1. Nigeh gül-bûse-çîn olmak ne mümkin la’l-i nâbından
Olur gül-pûş-i hayret surhî-i reng-i hicâbından
2. Bu gülşende nice erbâb-i dil gül-çîn-i kâm olsun
Nümâyândur sirişk-i dîde-i bülbül gül-âbından
3. ‘Acebdür halk olur ser-der-hevâ-yi câde-i nahvet
Sipihrün yek se rûze devlet-i pâ-der-rikâbından
4. Garîb-i hâksârun kadri ‘âlî oldugın anla
Kıyâs it şeb-nemün hurşîde fart-i incizâbından
5. Ser-i mû idemez dil vasf-i sevdâ-yi ser-i zülfün
Suhan zencîr olur pây-i beyâna pîç ü tâbından
6. İdüp bu nazmı ‘arz-i hâk-i pây-i hazret-i ‘Ârif
Bu takrîb ile Sâmî kesb-i feyz eyle cenâbından
7. O dânâ-dil k'olur hurşîd ü meh pâ-mâl-i izmihlâl
Sipihr-i tab’ınun kemter-şu’â’-i âftâbından
(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0
