195
Fâ‘ilâtün/ Fâ‘ilâtün/ Fâ‘ilâtün/ Fâ‘ilün
Niçe varam ey Süleymânum saña yasakcı var
Hüdhüd-i Belkıs’veş kapuñda bir nacakcı var
Taş taşıt Ferhâd’veş ey husrev-i Şîrîn-dehen
Kûyuñı seyrâna gelmiş niçe biñ aylakcı var
Derd-i ‘ışka çâre sor her gördügüñden ey göñül
Başına gelmiş benüm hâlüm niçe başmakcı var
Burc-ı çarha kim ‘alem dikdi benüm âhum gibi
Gerçi meydân-ı mahabbetde niçe bayrakcı var
Pâre pâre eylediler bâl-i murg-ı bâlümi
Pâdişâhum âsitânuñda niçe çaylakcı var
Kâse-i la‘linden olmadı içem bir katre su
Şehrümizde şimdi dükkân açdı bir bardakcı var
Barmagında kâse-i ser Ravziyâ fır fır döner
Şehr-i İdincik'de bir garrâ güzel çanakcı var
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
