136-
Fâ`ilâtün Fâ`ilâtün Fâ`ilâtün Fâ`ilün
1 Niçe girdi destine cellâd-ı mevtüñ Sâmı gör
Dâmına düşdi ecel sayyâdınuñ Behrâmı gör
2 Turmasun devr eylesün meclisde sâgar sâkiyâ
Sür`at-i devr-i zamânı gerdiş-i eyyâmı gör
3 Ârzû-yı kevser ü firdevs iderseñ zâhidâ
Ol zülâl-i la`li seyr it ol ruh-ı gül-fâmı gör
4 Ey belâ deştinde Mecnûnı temâşâ kılmayan
Gel hemân hâmûn-ı gamda bu dil-i şeydâmı gör
5 Bilmek isterseñ eger ehl-i cahîmüñ hâlini
Nâr-ı firkatda Ziyâ’î çekdügi âlâmı gör
Dr. Müberra GÜRGENDERELİ, MOSTARLI HASAN ZİYÂ’Î DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3195 KÜLTÜR ESERLERİ
