57
Mefâ‘îlün Mefâ‘îlün Mefâ‘îlün Mefâ‘îlün
1 Olursa ehl-i diller bezm içinde n’ola bülbüller
Surâhîler olupdur servler çün câmlar güller
2 Nice bir yaluñuz yügrük geçer bu hadd-i Gülgûnuñ
Koşulsun hat Şebdîze dil ü cân olsun öñdüller
3 Baña bu dûd-ı âhum serv ü sünbül ey göñül besdür
Yeter bu dâgum üzre daglar katmer karanfüller
4 Seni teshîr içün ey mâh saldum âteşe na‘li
Senüñçün ey perî sînemde kesdüm na‘l içüp müller
5 Sevâdü’l-vech fi’d-dareyn imiş vaki‘de âşıklık
Dil ü dînümden ayırdı beni ş’ol iki sünbüller
6 Sevâd-ı şi‘rüñ ile bulsa ragbet n’ola mülk-i Rûm
Olırdu Sun‘iyâ kâfûr mahv olmasa fülfüller
YRD. DOÇ. DR. HALİL İBRAHİM YAKAR, GELİBOLULU SUN‘Î DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3197 KÜLTÜR ESERLERİ, Gaziantep
