mefâ’îlün mefâ’îlün mefâ’îlün mefâ’îlün
1. Nedür sûdı bu bâzâr-i fenâda celb-i emvâlün
Gınâ virmez metâ’-i müste’ârı dûş-i dellâlün
2. Habâbâsâ girîbân-i sımâh-i zühdi çâk itdi
Şikest-i tevbeden âvâz-i nûş-â-nûşı şevvâlün
3. Girân-cânân-i zühd a’mâl ile uçmak ümîd eyler
Olur mı mâkiyâna lutf-i pervâzı per ü bâlün
4. Ser-i yem ebre irse katre-i bârân zuhûr eyler
Olur idbâr elbet mâ-verâsı fart-i ikbâlün
5. İder hâr-i müjem âzürde pây-i nâzükün şâyed
Dikilsem ey gül-i nev-rüste ma’zûr ola pâ-mâlün
6. Çekilmez vaz’-i nâ-sâzı sükût eylerse de nâ-dân
İşârâtı bedeldür güft ü gûya merdüm-i lâlün
7. Temîz-i nîk ü bed ‘ayn-i zarardur hurde-bînâna
Bu dikkat cismini sûrâh sûrâh itdi gırbâlün
8. Tahammül mihnete ser-mâye-i emr-i ta’ayyüşdür
Olur nef’i füzûn bârı girân oldukça hammâlün
9. Ne mümkin pey-rev olmak Nâbî-i üstâda ey Sâmî
Sevâd-i nâ-be-câdur meşk-i şi’ri kilk-i etfâlün
(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0
