[mefâ’îlün mefâ’îlün mefâ’îlün mefâ’îlün]
1 Ne kanlar dökdügin ‘arz itse çeşmüm yâre âl aŋlar
Tenüm gamdan hilâle döndi dirsem bir hayâl aŋlar
2 Gözüm merdümlerinüŋ ‘aksi düşmişdür letâfetden
Ruhuŋ mir’âtına nâzır olanlar anı hâl aŋlar
3 Hadîs-i ‘ışkı benden sor ne bilsün zâhid-i nâ-dân
Rumûzın bu mu’ammânuŋ mücerred ehl-i hâl aŋlar
4 Vücûd-ı vâcibüŋ mâhiyyetin idrâk iden ‘ârif
Hakîkatde vücûd-ı mümkinâtı hep zılâl aŋlar
5 Belâ bezminde zâr olsam ‘aceb mi çeng ü nây-âsâ
Kanı bir merd-i kâbil bu cihânda kîl ü kâl aŋlar
6 Fenâ bezminde Cem keyfiyyetin câm-ı mahabbetden
Harâbâta düşüp şûrîde-hâl olan ricâl aŋlar
7 Sühan bezminde Câmîdür bilen keyfiyyet-i şi’rüm
Hayâlât-ı kelâmum Rahmiyâ ancak Kemâl aŋlar
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,
