Gazel
Ne dem ol âfitâba hasret ile bir nigâh itdüm
Bir âh itdüm ki cümle hırmen-i sabrum tebâh itdüm
Sevüp bir Leylî-i müşgîn-nikâb-ı hüsni Kays-âsâ
Yine deşt-i cünûn-ı ışkı akla cilve-gâh itdüm
Bana teslîm olundı ser-be-ser sâmân-ı şeydâyî
Dem-i hilkatde zîrâ cümleden evvel ben âh itdüm
Ulüvv-i himmetin gördükde râh-ı nâ-tüvânîde
Dil-i üftâdeyi bir serv-i nâza hâk-i râh itdüm
Metâ'-ı vuslat-ı dil-dârı bâzâr olmadı mümkin
Hemân ser-mâye-i ümmîdi bîhûde tebâh itdüm
Gedâ-yı kûyun olmakdan ferâgat itmez el-hâsıl
Niçe kerre dil-i şûrîdeye teklîf-i câh itdüm
Nahîfî-veş recâ-yı vuslatun itdiyse afv eyle
Huzûrunda ne var bilmezlük ile bir günâh itdüm
Aypay, İhsan (1992). Nahifi Süleyman Efendi: Hayatı, Eserleri, Edebi Kişiliği ve Divanının Tenkitli Metni . Doktora Tezi. Konya: Selçuk Üniversitesi.
