138
Mefâ‘îlün Mefâ‘îlün Mefâ‘îlün Mefâ‘îlün
1 Ne bulduñ ey göñül hercâyi bir dildâr sevmekden
Varup gayr ile seyr eyler kamer-ruhsâr sevmekden
2 Ne umarsın ferâgat eyle gel ey ‘andelîb-i dil
Yüzi açılmış ellenmiş gül-i pür-hâr sevmekden
3 Yeter uçduñ hevâsında usan ey şâhbâz-ı dil
Gurâba sayd olur bir kebk-i hoş-reftâr sevmekden
4 Ne hâsıl bu cihân bagında ey cân bülbüli bilsem
Kokulanmış ayaklanmış gül-i gül-zâr sevmekden
5 Kinâr ola has u hâra varup ey bâgbân-ı dil
N’olur anuñ gibi bir serv-i gül-ruhsâr sevmekden
6 Varup sâkî vü reyhâncı ola çün gayrı meclisde
Geç ey dil bir saçı sünbül lebi mül yâr sevmekden
7 Seni koyup da bâzâr ide gayrı müşterîlerle
Ne assı Sun‘iyâ bir şâhid-i bâzâr sevmekden
YRD. DOÇ. DR. HALİL İBRAHİM YAKAR, GELİBOLULU SUN‘Î DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3197 KÜLTÜR ESERLERİ, Gaziantep
