40.
..-- / ..-- / ..-- / ..-
Ne bu mestâne bakışla bize bu gülmemeler
Turrañı bâg-ı ruhuñ üstine sünbüllemeler
‘Âşıkı serv-kadüñ üzerine ber-dârla
Her zamân eyleme ol zülf ile çengellemeler
Âh kim pâyüñe yüz sürmek idi maksûdum
Mâni‘-i hâhiş-i dil oldı o engellemeler
Her bir a‘zâ ile etvârına yok zerrece söz
Baña gâyetde pesendîdedür ol gül memeler
Gök gök olmış gibi kâr-ı şeb ile verd-i terüñ
‘Ukde-i sîmi güşâyişde mi bu ellemeler
Âsumân üzre süreyyâ mı ya pîr-i devrân
Keyf erbâbına ‘ıydiyye gıdâ tellemeler
Bende-i hâs-ı derüñ ya‘ni Sa‘îdüñdür bu
‘Âdet-i şân-ı şerîfüñ mi tecâhüllemeler
Saadet Karaköse, : Sa’id Giray Dîvânı, : © T.C. Kültür ve Turizm Bakanlığı Kütüphaneler ve Yayımlar Genel Müdürlüğü,2017 ISBN: 978-975-17-3636
