Fâ`ilâtün fâ`ilâtün fâ`ilâtün fâ`ilün
1 Nahl-i kaddünden haber aldukca cânâ bâddan
Ser-fürû itmez mi vardur servden şimşâddan
2 Aşık-ı mehcûrı şâhum yâdlerden saymayup
Lutflarla andugun bir dem gider mi yâddan
3 Müstedâm ol sîne-i bî-kînede idün karâr
Geçmedün ey tîr-i dil-ber hâtır-ı nâ-şâddan
4 Hüsnine magrûr olup gül gûşına koymazsa da
Bülbül-i şûrîde geçmez nâle vü feryâddan
5 Geşt-i deşt ü kûhdur erbâb-ı `aşkun pîşesi
Bir revişdür kim kalupdur Kays'dan Ferhâd'dan
6 Hazret-i Sultân Murâd'un feyzidür Yahyâ sözün
Ol şeh-i âlî-himemden kalma istimdâddan
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
