MÜSEDDES
1
Mef‘ûlü/ Mefâ‘îlü/ Mefâ‘îlü/ Fe‘ûlün
 
La‘l-i lebi ‘izhâr idüp mûy-ı Hüseyn’i
Hoş-bûyı tutar sünbüli şeb-bûy-ı Hüseyn’i
Kim görse sever kâmet-i dil-cûy-ı Hüseyn’i
Gün gibi tolansam ne ‘aceb kûy-ı Hüseyn’i
Ârâm idemez görmese dil rûy-ı Hüseyn’i
Sevdi dil ü cânum benüm ebrû-yı Hüseyn’i
 
Pâ-mâl görüp zülfi gibi şâm-ı gamında
Kan agladur oldı baña ahşam-ı gamında
Dil murgı giriftâr olup dâm-ı gamında
Eglence olur göñlüme hengâm-ı gamında
Ârâm idemez görmese dil rûy-ı Hüseyn’i
Sevdi dil ü cânum benüm ebrû-yı Hüseyn’i
 
Âzâd idüp hâl-i ruhı dâm-ı belâdan
Sevdâ-yı ser-i zülfi beni kesdi hevâdan
Pâk âyinesi jeng-i gam-ı mihr ü vefâdan
Dil şîşe-hurd olsa ne var seng-i cefâdan
Ârâm idemez görmese dil rûy-ı Hüseyn’i
Sevdi dil ü cânum benüm ebrû-yı Hüseyn’i
 
Ben niçe temâşâ idem ol mûy-ı miyânı
Müjgânlarınuñ tîrin atar kaşı kemânı
Reftârı hacîl eyler anuñ serv-i revânı
‘Âlemde Yezîd olsun o kim sevmeye anı
Ârâm idemez görmese dil rûy-ı Hüseyn’i
Sevdi dil ü cânum benüm ebrû-yı Hüseyn’i
 
Şemşîr-i gamı yâreleri sînede bitmez
Bir mihr ü vefâ eylese biñ cevrine yitmez
Ey Ravzî bana rahm ile bir kez nazar itmez
Dil-hastesine zahm-ı hadengi neler itmez
Ârâm idemez görmese dil rûy-ı Hüseyn’i
Sevdi dil ü cânum benüm ebrû-yı Hüseyn’i
 
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009