MURABBA 1
Fâ‘ilâtün/ Fâ‘ilâtün/ Fâ‘ilâtün/ Fâ‘ilün
Sen benümle söyleşüp fursat bulınca heyhât
Gülşen-i hüsnüm dikenlerle tolınca heyhât
Güllerüm pejmürde-hâl olup solınca heyhât
Baña kadrüñ bildürüp ol vakt olınca heyhat
Korkudup hattıle benden mihr ü mehüñ itmezem
Hey vefâ kıl diriseñ biñ kerre di işitmezem
Ben yarın gelen belâ içün bugün gam yimezem
Baña kadrüñ bildürüp ol vakt olınca heyhat
Ravza-i hüsnüm benüm bil bâg-ı cennetdür hemân
‘Ârız ummañ sebze-i ezhârına anuñ hazân
Bu mürûr-ı gerdiş-i gerdûn aña itmez ziyân
Baña kadrüñ bildürüp ol vakt olınca heyhat
Ruhlarum cennet gülidür sanma anda hâr olur
Ne der u dîvâr olur anda ne hod mismâr olur
Kim ola kim bâg-ı hüsnümden benüm bîzâr olur
Baña kadrüñ bildürüp ol vakt olınca heyhat
Tîz geçer diyü igen ta‘n itme eyyâmı gülüñ
Ki çog olmaz biz de bilürüz ziyânı bülbülüñ
Bâg-ı hüsnüm ‘ömrüñ oldukca yeter kıl gulgulüñ
Baña kadrüñ bildürüp ol vakt olınca heyhat
Koymadı koymaz da ra‘nâlıkda bir mislüm benüm
Gelmedi gelmez de şeydâlıkda bir mislüñ senüñ
Bir dahı Ca‘fer bulursam nic‘olur hâlüñ senüñ
Baña kadrüñ bildürüp ol vakt olınca heyhat
Hâtem-i hüsn-i cemâlüm Mustafâ dirler baña
Kim şifâ-i bedr-i hüsnüm irişüpdür her yaña
Eyle bilgil varıcak mensûr-ı takrîrüm saña
Baña kadrüñ bildürüp ol vakt olınca heyhât
Dr. Yaşar AYDEMİR, BEHİŞTÎ DÎVÂNI, https://ekitap.kulturturizm.gov.tr/
