Murabba
Fâ‘ilâtün/ Fâ‘ilâtün/ Fâ‘ilâtün/ Fâ‘ilün
Sâzumuz diñler felekde Zühre-i zehrâ bizüm
Kûşe-i zevk u safâmuzdur bugün dünyâ bizüm
Sînemüzde zâhidâ neyler gam-ı ferdâ bizüm
Bezmümüz peymânesidür Kevser-i Me’vâ bizüm
Cür‘amuzdan perveriş bulmış durur Tûbâ bizüm
İrmedi rûz-ı ezel meşhûr iken el-vakt seyf
Bunca yıllar ‘ömrümüz derd ü belâda geçdi hayf
Ger sorarsañ şimdiki ahvâlümizden kemm u keyf
Dildeki buhrânumuzdan bir eserdür sûr-ı sayf
Bâd-ı âh-ı serdümüzden [kalmadur]245 sermâ bizüm
Şerbet-i tıbdan iderseñ kâse-i gerdûnı pür
Cânı yokdur sînemüzden def‘ ola mânend-i har
‘Îşumuz şöyle olupdur fürkat-i telh ile pür
Gam deminde dîdemüzden hâke düşmiş katredür
Taglarca mevc peydâ eyleyen deryâ bizüm
Jeng-i efkârı gözüñden dâmen-i sa‘yile sil
Nûr-ı ‘ışkıle derûnuñ hâne-i tâbende kıl
Hâlümüzden ger haber bilmek dilerseñ şöyle bil
Biz hakîkat defterinde mürdeyüz ey zinde-dil
Üstümüzde türbemüzdür künbed-i hadrâ bizüm
Bunda tahsîl itmege geldük rızâ-yı Hâlıkı
Zâyi‘ itdük vâdi-i nisyânda ‘ahd-ı sâbıkı
Şânumuz zikr itmek oldı bu kelâm-ı sâdıkı
Ey Behiştî ‘afv olınmazsak siyâset lâyıkı
Bir alay mücrimlerüz zindânumuz dünyâ bizüm
Dr. Yaşar AYDEMİR, BEHİŞTÎ DÎVÂNI, https://ekitap.kulturturizm.gov.tr/Eklenti/10597,behistipdf.pdf?0
