Murabba
Mef‘ûlü/ Fâ‘ilâtü/ Mefâ‘îlü/ Fâ‘ilün
Rûz-ı ezel olup bize ‘unvân mu‘âf-ı ‘ışk
Münkirler ile itmege geldük mesâf-ı ‘ışk
Şemşîr-i âha her birümüz bir gılâf-ı ‘ışk
Zâhid bizi güzâfa urur sanma lâf-ı ‘ışk
Kâlü belâda eylemişüz i‘tirâf-ı ‘ışk
Lâ-ya‘kıl eyleyen bizi âb-ı ‘ineb degül
Esrâr ile mülemmâ olan berş ü hab degül
Ta‘n eylemek ekâbir-i ‘ışka edeb degül
Her yaña salınup bilinürseñ ‘aceb degül
Sâkî [kim] eyledi bizi ser-mest-i sâf-ı ‘ışk
Dîdâruñuñ müşâhadesi zevkını tuyup
Pâk eyledüm iki gözümi ‘ışkuñla yuyup
Şeytânlık itmez âdem olan nefsine uyup
Dil mâ’il-i mülk ola mı haddüñi koyup
Sayd-ı meges mi eyleye sî-murg-ı Kâf-ı ‘ışk
Aldum rebâbı Zühre’den evtâr-ı ‘ûdumı
Saldum sipihre nâle-i sâz u sürûdumı
Mahzûn idem gibi yine cümle hasûdumı
Zerrîn tel itdi sırma-keş-i gam vücûdumı
Tâ-nakş-ı câmına süre zer-bâft-ı nâf-ı ‘ışk
Şol dem ki olmış idi ezel bezmine salâ
Dîdâr-ı yâre cân u dil olmışdı mübtelâ
Cismüm nedür sorarsañ eger diñle evvelâ
Başum Behişti bir depedür çıkmaga belâ
İşlek yol aña sînedeki her şikâf-ı ‘ışk
Dr. Yaşar AYDEMİR, BEHİŞTÎ DÎVÂNI, https://ekitap.kulturturizm.gov.tr/Eklenti/10597,behistipdf.pdf?0
