Mefâ‘îlün/ Mefâ‘îlün/ Mefâ‘îlün/ Mefâ‘îlün
Ne gûşumda tarab-sâz u nevâsından nevîdüm var
Ne göñlümde gam-ı dünyâ ne bu fikr-i medîdüm var
Ne hizmetkâr-ı sultânem ne gavgâ-yı ‘abîdüm var
Harîf-i fârigu’l-bâlem ne şeyh u ne mürîdüm var
Ne beg yanında maksûdum ne paşadan ümîdüm var
Gehî eyler gam-ı ‘ışkı dil aña hem eglence
Geh olur kûşe-i ‘uzletde zikru’llâhum eglence
Yeter baña gözüm yaşıyla dûd-ı âhum eglence
Gedâ-yı lâ’ubâliyem gerekmez şâhum eglence
Ne dilde ârzû-yı cû ne meyl-i şâh-ı bîdüm var
Makâm-ı ‘uzletüñ itdüm derûndan niyyet-i cürmin
Degişdüm sulha ser-cümle hased erbâbınuñ rezmin
Fenâ meyhânesinüñ nakde çekdüm âlet-i bezmin
Ne gam ‘ışkuñla eylersem eger râh-ı ‘adem ‘azmin
Ki koynumda bütün dünyâ deger dürr-i ferîdüm var
Harâbât-ı cihân içre olup serdâr-ı pây-ı hum
Şebistân-ı melâmetde selâmet nakdin itdüm güm
Makâm-ı istirâhatden murâd alur degül merdüm
Geçerse rûze-i fakr u fenâda gam degül ‘ömrüm
Ki soñunda benüm rûz-ı kıyâmet ‘adlu ‘îdüm var
Alup pâ-bendin ıtlâk itdüm esb-i himmetüñ sâkın
Şikâristân-ı ser-sebzüñ çıkup geşt itdüm âfâkın
Getürdüm sayd-ı maksûduñ zamân-ı fursatın yakın
Kebûter sanma destümde Behiştî şi‘rüm evrâkın
Horos-ı ‘arşa ser-pençe urur bâz-i sepîdüm var
Dr. Yaşar AYDEMİR, BEHİŞTÎ DÎVÂNI, https://ekitap.kulturturizm.gov.tr/Eklenti/10597,behistipdf.pdf?0
