MURABBA’-I ‘AVÂM-PESEND
mefâ’îlün mefâ’îlün mefâ’îlün mefâ’îlün
1
Göñüllerde yer itmiş dil-rübâ-yı nâz-perversin
Kız-oglan şîveli bir nâzenîn-i mâh-peykersin
Ki bir bakışda gılmân bir bakışda hûra beñzersin
Kız-oglan şîveli bir nâzenîn-i mâh-peykersin
2
Bilinmez kız mısın oglan mısın güftâra geldükde
Seçilmez gül misin bülbül misin gülzâra geldükde
Müzeyyen nahl-i sûruñ ‘aynısın reftâra geldükde
Kız-oglan şîveli bir nâzenîn-i mâh-peykersin
3
Niçe tâb-âver olsun ol cemâle ‘âşıkuñ cânâ
Gül-i rûyuñ ider her gonçeyi bir bülbül-i şeydâ
Siyeh perçemlerüñ Leylîleri Mecnûn ider hâlâ
Kız-oglan şîveli bir nâzenîn-i mâh-peykersin
4
Ne hâletler virür cünbiş-i nâfeñ dil ü hûşa
Nice raksuñ görüp ben gelmeyem deryâ gibi cûşa
Dökersin perçem-i pür-çîn-i ‘anber-bâruñı dûşa
Kız-oglan şîveli bir nâzenîn-i mâh-peykersin
5
İdince ‘âleme mihr-i cemâlüñ Pertev-endâzî
Senüñle idemez mâh-ı semâ da’vâ-yı enbâzî
Perîler senden ögrense sezâdur şîve vü nâzı
Kız-oglan şîveli bir nâzenîn-i mâh-peykersin
Dr. Ekrem Bektaş, MUVAKKİT-ZÂDE MUHAMMED PERTEV DÎVÂNI, Malatya-2007, https://ekitap.kulturturizm.gov.tr/Eklenti/10630,muvakkitzade-pertevpdf.pdf?0
