MURABBA 26
Fâ‘ilâtün/ Fâ‘ilâtün/ Fâ‘ilâtün/ Fâ‘ilün
Cân u dil tahtına şâh-ı ercemendüm gelmedi
Bûstân-ı lutfa serv-i ser-bülendüm gelmedi
Mısr-ı gamda teşneyem cüllâb-ı kandüm gelmedi
N’ideyin hayfâ ki Lutfullâh efendüm gelmedi
Niçe döysün haste-dil bu kahr-ı hecrüñ nîşine
Lutf u himmet ni‘metinden taş tokunmaz dişine
Şeyh olan lâyık mıdur cevreylemek dervîşine
N’ideyin hayfâ ki Lutfullâh efendüm gelmedi
Bu nühûset kim göñül mülkini virân eyledi
Düşmeni handân idüp ahbâbı giryân eyledi
Mihnet-i hasret baña dünyâyı zindân eyledi
N’ideyin hayfâ ki Lutfullâh efendüm gelmedi
Gelmege ‘ahd eylemişken ol şeh-i ‘âli-neseb
Yine hulf-i vaèdeye bilsem ‘aceb neyki sebeb
Makdemine muntazırdur gerçi kim ahbâbı hep
N’ideyin hayfâ ki Lutfullâh efendüm gelmedi
Şehr-i İdincik diyârın itse teşrîf ol melek
Ravziyâ kutb-ı murâdum üzre dönerdi felek
Hakk’a çok itdüm tazarru‘ eyledüm yüz biñ dilek
N’ideyin hayfâ ki Lutfullâh efendüm gelmedi
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
