Müjde-i vuslat ile çeşm-i dil cân uyumaz
Hâhiş-i îd ile etfâl-i sebek hân uyumaz
Dilde ger aşk ola akl eylemez anda karâr
Düzde zindân olur ol dâr ki mihmân uyumaz
Seyr eden vaz’-ı şütûr gürbesini bu felegin
Açılır dîdesi çün encüm-i rahşân uyumaz
Gamzesin hançer-i hâbîde sanırsın ammâ
Uyudur fitneyi havf-ile o fettân uyumaz
Dîdesi havf-i rakîb ile olup eşk-efşân
Su uyur düşman uyur haste-i hicrân uyumaz
Kaplamış zülfü husûf ârız olup ârızını
Kimdir eyâ bu şeb-i gamda perişân uyumaz
Gâlibâ hicret eden kâfile-i râhatdır
Dil ki mânend-i ceres eyleyip efgân uyumaz
https://ekitap.kulturturizm.gov.tr/Eklenti/10654,metinpdf.pdf?0
