MUHAMMES:
Mefâ‘îlün/ Mefâ‘îlün/ Mefâ‘îlün/ Mefâ‘îlün
Yaşum deryâsı mevc urdukca bahr-ı bî-gerân iñler
Figânum âlemi tutdukca her kûh-ı girân iñler
Derûnum nâle peydâ eyledükce ins ü cân iñler
Kaçan kim zâr u dil-haste olup bir nâ-tüvân iñler
Anuñ feryâdına rahm eyleyüp kevn ü mekân inler
Olupdur nûr-ı ‘ışkıle benüm göñlüm gözüm rûşen
Anuñçün nice esrâr-ı nihâna vâkıf oldum ben
Bu ma‘nâyı egerçi ey kemân kaş añlamazsın sen
Rakîbüñ bagrına tokunmadı diyü te’essüfden
Ne meydânda bir ok atılsa ardınca kemân inler
Ruh-ı yâri belâ deştinde bitmiş lâle mi sanduñ
Dil-i ‘uşşakı bu hüsn ü mecâzı ala mı sanduñ
Fenâ bezmi bu ‘âlemde mü’ebbed kala mı sanduñ
Ney ü çeng ü rebâbuñ sen figânun nâle mi sanduñ
Beni gör kim bir âh itsem zemîn ü âsmân inler
Harâbât ehli ol sürmek dilerseñ zevk-ı erzânî
Ele al câmı isterseñ fenâ derdine dermânı
Şarâb-ı nâb ile ‘ömrüñ olur biñ yılca bir anı
‘Acebdür kim murâdınca içerken Âb-ı Hayvân’ı
Niçün sâkî za‘îf oldum diyü pîr-i mugân inler
Mahabbet ‘âşıkı rûbâh olursa dönderür bebre
Dem-i gayretde kalmaz kudreti bir zerrece cebre
Fakîre merhamet itmez ider tersâya vü gebre
Behiştî ey güneş yüzli niçün incinmesün ebre
İkide bir ser-i kûyuña geldükçe hemân iñler
Dr. Yaşar AYDEMİR, BEHİŞTÎ DÎVÂNI, https://ekitap.kulturturizm.gov.tr/Eklenti/10597,behistipdf.pdf?0
