MUHAMMES  4
 
Fâ‘ilâtün/ Fâ‘ilâtün/ Fâ‘ilâtün/ Fâ‘ilün
 
Aç gözüñi bâb-ı Hakk’a togrı varan râhı gör
Münkir olma sırr-ı hûya ‘ârif-i âgâhı gör
Râh-ı Hak’da gice gündüz derd ile evvâhı gör
Müşkilât-ı fenn-i ‘ışkı kâşif olan şâhı gör
Şâh-ı iklîm-i kerâmet Şeyh Lutfullâh’ı gör
 
Câmi‘-i Hak’da ne vaktin kim ‘ibâdât eylese
Yiri gögi ditredür Hakk’a münâcât eylese
Hak kabûl eyler du‘âsın ‘arz-ı hâcât eylese
Mât ider sâhirleri keşf-i kerâmât eylese
Şâh-ı iklîm-i kerâmet Şeyh Lutfullâh’ı gör
 
Fahr-i âl-i Mustafâ’ya ol durur kâ’im-makâm
Ravza-i Sultân Emîr anuñla buldı intizâm
Ka‘be-i kûyın tavâf eyler melekler subh u şâm
Nûrdan bir serv olur kılsa namâz içre kıyâm
Şâh-ı iklîm-i kerâmet Şeyh Lutfullâh’ı gör
 
Olayın dirseñ eger makbûl-i erbâb-ı himem
Rûyuñı hâk-i reh-i dergâhına sür dem-be-dem
Gel nazar kıl kurb-ı Hakk’a niçe basmışdur kadem
èÂrızında berk urur nûr-ı Resûl-i muhterem
Şâh-ı iklîm-i kerâmet Şeyh Lutfullâh’ı gör
 
5 Zümre-i erbâb-ı ‘ışka kılayın dirseñ duhûl
Gitme dergâhından ey dil gel o şâhuñ sen sen ol
Tâlibi matlûbına irişdürür bir demde ol
Anuñ ile buldı revnak türbe-i Âl-i Resûl
Şâh-ı iklîm-i kerâmet Şeyh Lutfullâh’ı gör
 
Teşne-leb gezme yabanda çeşme-i hayvâna gel
Taña kalmış necmi terk it şems-i ‘âlî-şâna gel
Dâmen-i kesretden el çek menba‘-ı ihsâna gel
Rûy-ı vahdet gösteren âyîne-i ‘irfâna gel
Şâh-ı iklîm-i kerâmet Şeyh Lutfullâh’ı gör
 
Diler iseñ saña seyrângâh ola ‘arş-ı berîn
Tûtiyâ kıl dîde-i cân u dile hâk-i derin
Pâdişâh-ı dehre istignâ iden sultân-ı dîn
Şimdi kimdür bilmek isterseñ eger ‘ilme’l-yakîn
Şâh-ı iklîm-i kerâmet Şeyh Lutfullâh’ı gör
 
Ey dil isterseñ eger dünyâ vü ‘ukbâ devletin
Sen sen ol al anuñ ecdâd-ı ‘ızâmı himmetin
İşiginde bende-i ednâ olup kıl hıdmetin
Göreyin dirsen Hak’uñ ‘âlemde feyz-i rahmetin
Şâh-ı iklîm-i kerâmet Şeyh Lutfullâh’ı gör
 
Sâliki cezb itmede bir keh-rübâdur ol hümâm
Mübtedîler müntehî kılmakda olmışdur be-nâm
Hıdmetinde cân u dilden ihtimâm it ihtimâm
Mâsivâ fikrin çıkar dilden sözüm tut ve’s-selâm
Şâh-ı iklîm-i kerâmet Şeyh Lutfullâh’ı gör
 
10 Ol künûz-ı zühd ü takvânuñ emîn ü mâliki
Bir nefesde hazrete îsâl ider biñ sâliki
Sevmeyen anı ‘aceb bilsem niçe bed-haliki
Bidürür saña rumûz-ı külli şey’in hâliki
Şâh-ı iklîm-i kerâmet Şeyh Lutfullâh’ı gör
 
Ol vilâyet gülsitânınuñ gül-i handânına
Ol kerâmet güllerinüñ bülbül-i nâlânına
Cân-ı dilden ‘âşık ol mazhar düşüp ihsânına
Bî-riyâ tâ‘at ider her rûz u şeb Sübhânına
Şâh-ı iklîm-i kerâmet Şeyh Lutfullâh’ı gör
 
Nefs-i şûm pür hiyel mekrine uyup serseri
Vâdi-i gafletde gezme ey tevânger gel beri
Niçe ihyâ eylemişdür sünnet-i peygâm-beri
Ol velîler zümresinüñ server-i ser-defteri
Şâh-ı iklîm-i kerâmet Şeyh Lutfullâh’ı gör
 
Âşiyân-ı kerkese konmaz hümâ-pervâz olan
Sayd-ı zâg u serçeye meyl eylemez şeh-bâz olan
Dâ'imâ şol evliyâullâhla dem-sâz olan
Bâyezîd-i vakt olan eşyâhdan mümtâz olan
Şâh-ı iklîm-i kerâmet Şeyh Lutfullâh’ı gör
 
Sûfiler gibi safâ bul dâ'imâ sâfî dil ol
Meclis-i nâ-dânı terk it kâmili sev kâmil ol
Tevbe kıl cürm ü hatâya sünnet ile ‘âmil ol
Mâ’il-i ehl-i hevâ olma bu kavle kâ‘il ol
Şâh-ı iklîm-i kerâmet Şeyh Lutfullâh’ı gör
 
15 Tâbi‘ olup nefs-i şûmuñ her zamân ehvâsına
Kendüñi salma ‘abes yire cihân gavgâsına
Girmek isterseñ Hudâ’nuñ cennetü’l-me’vâsına
Bir nazarda sâliki irişdürür Mevlâsına
Şâh-ı iklîm-i kerâmet Şeyh Lutfullâh’ı gör
 
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009