587
Mef‘ûlü/ Mefâ‘îlü/ Mefâ‘îlü/ Fe‘ûlün
Tâli‘ beni bir âfet-i devrândan ayırdı
Şol mürdeye döndüm ki felek cândan ayırdı
Dil-hânesi dönse şeb-i târîke ‘aceb mi
Devrân beni bir mihr-i dırahşândan ayırdı
Mısr-ı gama şâh itdi beni çarh-ı bed-ahter
Ya‘kûb-sıfat Yûsuf-ı Ken‘ân’dan ayırdı
‘Ömrüm gülini bâd-ı hazân itdi perîşân
Nâ-geh beni ol yâr-i perî-şândan ayırdı
Müjgânı gamında n’ola kan aksa cigerden
Dildâr beni hancer-i bürrândan ayırdı
Bî-çâre görüp pister-i gamda kodı gitdi
Gitdükce tabîbüm beni dermândan ayırdı
Ravzî n’ola her sû gözümüñ yaşı akarsa
Devrân beni bir serv-i hırâmândan ayırdı
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
