Fâ`ilâtün fâ`ilâtün fâ`ilâtün fâ`ilün
 
 1 Mest-i câm-ı `aşkdur gitmez dem-â-dem neşvesi
 Vardur mestâne gönlümde benüm Cem neşvesi
 2 Tâc-ı Edhem neş'esin terk itme bâri zâhidâ
 Çünki yokdur sende Ibrâhim Edhem neşvesi
 3 Sâki-i bezm-i mahabbet câm-ı mihnet kim sunar
 Hem humârı hoş gelür bana anun hem neşvesi
 4 Baş kaldırmayup içmek istesek sâkî nola
 Ser-girân itdi bizi peymâne-i gam neşvesi
 5 Neşvedâr itmişdi Yahyâ'yı mey-i bezm-i elest
 Dahı peydâ olmadın `âlemde âdem neşvesi
 
 
Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147