Meŝnevį-yi Yaĥyā Derna't-ı Nebiyyü’r-Rahmet Aleyhi’ś-Śalātu ve’s-Selām
FeǾilātün / MefāǾilün / FeǾilün
1. Vāķıf-ı rāz-ı Ǿilm-i Ǿālem-i ġāyb
Kāşif-i sırr-ı muśĥaf-ı lārayb
2. Nüktedān-ı rumūz-ı mā evĥā
Şāh-ı Ǿālį-maķām-ı ev-ednā
3. ĶāniǾ-i ĥevl-i kenz-i lā yefnā
Pādşāh-ı serįr-i faķr u fenā
4. YaǾni sulŧān-ı enbiyā-yı ümem
Sebeb-i raĥmet-i benį Ādem
5. Muśŧafā vü Muĥammed ü Maĥmūd
Aĥmed-i Mürsel ü Ĥabįb-i Vedūd
6. Çār isminde mįm-i temmet var
Ķıldı ħatm-i Nübüvveti eşǾār
7. Anı ħalķ itdi ibtidāda Ħudā
Enbiyā hep ŧufeyl oldı aña
8. Ħātime žāhiren o server olur
Gāh olur mübtedā muǿaħħar olur
9. Adı ümmį vü Ǿālim ü dānā
MuǾcizāt oldı ümmilikle aña
10. İki şaķ itdi gökteki ayı
İki şāhidle itdi daǾvāyı
11. Ķurś-ı mihri benān-ı faħr-i cihān
Elife döndi nūn içinde hemān
12. Şaķ idüp māhı ol benān-ı şerįf
Ĥüsnini eyledi anuñ tanśįf
[105b] 13. Dü zebān oldıġiçün ħāme
Ele almadı yazmadı nāme
14. Baĥŝ-i dįn içre ol ħuceste-ħıśāl
Ħāmeveş ehl-i küfri eyledi lāl
15. Sāyesi n’ola bulmazise žuhūr
Žulmet-i dehre maniǾ idi o nūr
16. Çünki bįsāyedür o nūr-ı Ħudā
Sāye-yi ħaŧŧ degüldür aña sezā
17. Āftāb üzre merkebi her gāh
Sāyebān oldı aña ebr-i siyāh
18. Ĥażret-i Ĥaķķa ol şifā-yı ķulūb
Hem ĥabįb oldı hem daħı maĥbūb
19. Oldı dürr-i yetįm o ħayr-ı ħalef
Ķālıb-ı Ādem idi aña śadef
20. Gördi Aĥmed de bir yed-i beyżā
Ķodı el arķasın yere Mūsā
21. Dili Mūsādan oldı çünki faśįĥ
Ĥüsni Yūsufdan olsa ĥükmi melįĥ
22. Gelmedin Ǿāleme o şāh-ı cemįl
Ķulı ķurbānı idi İsmāǾįl
23. RifǾatin gördi Ĥażret-i ǾĮsā
Ümmeti olmaġiçün itdi duǾā
24. Ġarķa-yı baĥr-i cūdı kevn ü mekān
Teşne-yi āb-ı luŧfı Ħıżr-ı cihān
25. ŞemǾ-i ħalvet-serāyidi meh-i bedr
Ĥabeşį bir ķulıdur şeb-i Ķadr
26. Ŧoġdı çün Ǿāleme o mihr-i kemāl
Secdeye vardı itdi ķaddini dāl
27. Nūr-ı pāk-ı Muĥammed-i ǾArabį
Ķara gül itdi nār Bū Lehebi
28. Olmış idi ĥadįŝ-i vaĥy-ı Ħudā
Var idi her sözünde biñ maǾnā
29. Devlet anuñ ki ola aña muŧįǾ
Bir anuñ gibi şāhı ide şefįǾ
30. Niçe medĥ eylesün anı Yaĥyā
Çünki meddāĥıdur anuñ Mevlā
31. ŞemǾ-i ĥüsni sebįl-i Ĥaķķa delįl
Oldı pervāne aña Cebrāǿįl
32. Ħāk-ı dergāhı tāc-ı çarħ-ı laŧįf
Şeb-i MiǾrācı rūz-ı Ǿıyd-ı şerįf
Mustafa Atila, NU’ÛT-I NEBEVİYYE MECMÛASI, Dicle Üniversitesi Sosyal Bilimler Enstitüsü ,Yüksek Lisans Tezi Diyarbakır 2012
Taşlıcalı Yahya Hayatı ve Edebi Kişiliği
Gencine-i Raz Mesnevisi Taşlıcalı Yahya
Taşlıcalı Yahya Yusuf u Züleyha Mesnevisi
Taşlıcalı Yahya Şah u Geda Konusu Hakkında Bilgiler
Kitab-ı Usul ile Edirne ve İstanbul Şehrengizleri Taşlıcalı Yahya
Taşlıcalı Yahya Seçilmiş Şiirleri
Taşlıcalı Yahya Şah u Geda Mesnevisi Hakkında ve Özeti
Şah u Geda Özetleri Bursalı Rahmi Taşlıcalı Yahya
Taşlıcalı Yahya Gülşen- i Envar ( Alıntılar Özet ve Hakkında Bilgile
