Mefâ‘îlün/ Mefâ‘îlün/ Mefâ‘îlün/ Mefâ‘îlün
Mehemmed Şâh ile ey dil Memi Şâh iki gül-rûdur
Birinüñ çeşmi nergisdür birinüñ zülfi şeb-bûdur
Biri deryâ-yı hüsne mâlik olmış âşinâmuzdur
Biri bîgânelerle yâd olur bir yâr-ı bed-hûdur
Sadefdür birinüñ agzı sever cân ol dür-i pâki
Lebi la‘l-i Bedahşî birinüñ dendânı lü'lûdur
Birisi kırmızı giymiş nihâl-i ergavân sandum
Birine ‘âlemi şeydâ iden ol çeşm ü ebrûdur
Birinüñ hâl-i hindûsından olur fitneler zâhir
Biri bir Sâmirî sihrine mâlik çeşmi câdûdur
183
Biri bir hûb ra‘nâdur biri mahbûb-ı garrâdur
Melâhatde ber-â-berdür nazar kıl göz terâzûdur
Birinüñ kayısı la‘linden alup tâze şeftâlû
Birisinden hemân ancak murâdum sâde pehlûdur
Nazîr olmaz ol iki âfitâb-ı mâh-ruhsâra
Birisi bir firişteh-hû biri bir yâr-ı nîgûdur
Ol iki şûh-ı zîbâlar ki hüsn içre müsellemdür
Biri pâlûde-i terdür birisi bir içim sudur
Letâfet bûstânında biri bir nahl-ı bâlâdur
Çemenzâr-ı melâhatde biri bir serv-i dil-cûdur
Birine ‘âdet ü pîşe olupdur ‘âşık öldürmek
Birisinden vefâ gelmez aña dâ'im cefâ-hûdur
Birine biñ belâ çekdüm olunca âşinâ ammâ
Biri bir yâdlarla salınur hod-bîn ü hod-rûdur
Birisinüñ egerçi kâküli sevdâsına düşdüm
Dil-i dîvâneyi bend eyleyen ol iki gîsûdur
Biri bir şeh-süvâr-ı ‘arsa-i hüsn ü melâhatdür
Beni Ravzî-sıfat pâ-mâl-i devrân eyleyen odur
Biri ferzend urandur biri ferzend ‘umar andan
Biri bir gonce-i nev-res biri gül gibi hoş-bûdur
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
