Meger ki zülfüñe irdi girü nesîm-i şemâl (401/1)
Ki toldı râyihasından anuñ yemîn ü şimâl
Yüzüñ firâkı-y-ıla kaşuñ iştiyâkından (401/2)
Sarardı bedr kayuñdan iki büküldi hilâl
Yile vire varakın gül dükile lâle yire (401/3)
Eger hayâline bâguñ geçer-ise bu hayâl
Beyânumı dudaguñ şerhi itdi Âb-ı Hayât (401/4)
Kelâmumı gözüñüñ vasfı kıldı sihri-i halâl
Saçuñ hevâsı dimâgumdadur zi nagz hevâ (401/5)
Yüzüñ hayâli gözümde-durur zi hûb hayâl
Cemâl saña sunuldı kemâl-ile Yâ-Rab (401/6)
İrişmesün bu cemâla cihânda ayn-ı kemâl
Revâ mı Ahmedi ışkuñ yolunda teşne ola (401/7)
Revân-iken dudaguñda senüñ hoş âb-ı zülâl
 
https://ekitap.kulturturizm.gov.tr/Eklenti/10591,ahmedidivaniyasarakdoganpdf.pdf?0