427
Fâ‘ilâtün/ Fâ‘ilâtün/ Fâ‘ilâtün/ Fâ‘ilün
Meclis-i hüsn içre kim ser-halka-i hûbânsın
Kimseye rahm eylemez bir bî-vefâ cânânsın
Bir güneş-ruhsın Hamel burcından olduñ âşikâr
Yâ melâhat âsmânında meh-i tâbânsın
Şâhlar olsa ‘aceb olmaya şâhâ çâkerüñ
Hüsn-i bî-misl ile heft iklîme bir sultânsın
N’ola ma‘mûr olmasañ ey dil vefâ-yı yârdan
Mesken-i künc-i cefâ olmaga bir vîrânsın
‘Âleme dürler nisâr eylersin ey dil var ise
Ma‘rifet gevherlerine Ravzi gibi kânsın
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
