Mefâ‘îlün Mefâ‘îlün Mefâ‘îlün Mefâ‘îlün
1 Marîz-i ‘aşk-ı hûbânam ki sıhhat dûr olur benden
Mesîhâ gelse ger bâlînüme rencûr olur benden
2 Libâs-ı ‘âfiyet sad-çâk o rind-i mey-perestem kim
Salâh âzürde hâtır-ma‘siyet mesrûr olur benden
3 Olur erbâb-ı ‘aşka bâ‘is-i hâtır-perîşânî
Rumûz-ı ‘aşkdan her satr kim mestûr olur benden
4 Dil-i pür-âteş ile hâne-sûz-ı ‘işretem ammâ
Serây-ı bî-der ü dîvâr-ı gam-ı ma‘mûr olur benden
5 Mülâyim olsa bana n’ola gerdûn âteşem Âgâh
Ki bâzû-yı kemân-ı imtihân bî-zûr olur benden
Dr. ŞERİFE AKPINAR’ ÂGÂH (Semerkândî-i Âmidî) DÎVÂN, KÜLTÜR VE TURİZM BAKANLIĞI KÜLTÜR ESERLERİ 502 2012,
