Lebin bûsun zamân-ı hatt-ı anber-fâm içün saklar
Aceb nâzüklük eyler bâdesin ahşam içün saklar
2. Hudâ olsun nigâhdârı derûn-ı sînede âşık
Gönül âyînesin bir mâh-ı sîm-endâm içün saklar
3. Dil-i bîmârıma hiç hisse vermez subh gûyâ kim
Şeker-hâbın hemân ol gözleri bâdâm içün saklar
4. Hezârı sanmanız hâbide zîr-i bâle minkârın
Hayâl-i gonca-i sîr-âbın istişmâm içün saklar
5. Hem-âgûşî-i fincân-ı arakdan kaçmaz ammâ kim
Nigîn-i la‘lin ol bâzîçeyi ahşam içün saklar
6. Senindir âkıbet ey dîde-i ter dildeki hûn-âb
Ki humlar bâdeyi pinhan da etse câm içün saklar
7. Eder îcâd-ı harf u savt mevce-i hande-i gülden
Anı zîr-i lebinde âşıka düşnâm içün saklar
8. Lebin vasfında bir mazmun demişdim reng ü bû sanma
Anı ceybinde güller bülbülü ilzâm içün saklar
9. Nedîmâ bu kumâş-ı heft-reng-i âlem-ârâsın
Tırâz-ı mesned-i vâlâ-yı heft- ecrâm içün saklar
10. Nice mesned ki bâlâ-yı şafakda mihr onu dâ'im
Edüp pûşîde ol sadr-ı mu‘allâ-nâm içün saklar
MACİT, Muhsin, Nedîm Divanı, Akçağ Yayınları, Ankara 1997.
https://ekitap.kulturturizm.gov.tr/Eklenti/10635,nedim-divanipdf.pdf?0
