Fâ`ilâtün fâ`ilâtün fâ`ilâtün fâ`ilün
1 La`lüne meylüm görenler mey-perest anlar beni
Işiden feryâdumı yollarda mest anlar beni
2 Kadrümi `âlî nazarlardur benüm âlî bilen
Hâk-i zilletde görenler gerçi pest anlar beni
3 Anlamaz keyfiyyet-i hâl-i dilüm hüşyâr olan
Mest-i câm-ı bâde-i bezm-i elest anlar beni
4 Eyleyüp dünyâya meyl illerle eyler ihtilât
Girmez ol âfet elüme teng-dest anlar beni
5 Lutfını ol mû-miyânun gör ki bir cevr eylese
Sarılur Yahyâ hemân hâtır-şikest anlar beni
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
