Fâ‘ilâtün/ Fâ‘ilâtün/ Fâ‘ilâtün/ Fâ‘ilün
Kûyuña cânâ diyenler Ka‘be-i ‘ulyâ budur
Eşk ü rûyumçün didiler zemzem ü Bathâ budur
Bildi Âdem nâmuñı cânâ melekler bilmedi
Ma‘ni-yi i‘lâ-yı ‘ilm-i ‘alleme’l-esmâ budur
‘Işk ile bünyâd olınmış taht-ı kâmuñdur senüñ
Zulm ile dil hânesin yıkmaga saña câ budur
Hızra irişdüm leb-i cânânumı sordum didi
Bir nefesde mürdeler ihyâ iden ‘Îsâ budur
Ravziyâ ol sîb-i gabgab gördi rûy-ı zerdümi
Bâg-ı ‘ışk içre didi nârenc ile ayvâ budur
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
