Mefâ`îlün mefâ`îlün mefâ`îlün mefâ`îlün
1 Komadı bezmi teşrîf itmege teb tutdı cânânı
Konuz bî-tâb `âşık inlesün kim hastedür cânı
2 Koy a ey teb koy a bî-rahm imişsin kanı insâfun
Revâ mıdur perîşân eylemen ol verd-i handânı
3 `Aceb bir başına dermânı yok bî-çâredür âşık
Halâs eylerdi başın derdmendün olsa dermânı
4 `Arak-rîz oldugın gül-berg-i ra`nâyı görüp bildüm
Gül-âb ile devâ eyler tabîb-i lutf-ı Yezdânî
5 Girihler oldı peydâ rişte-i cânında Yahyâ'nun
Görince tâb-ı tebden muztarîb ol necm-i rahşânı
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
