Kaside
 
 Şeyhi ve Ahmet Paşa’nın "Kerem " Redifli Kasidesine  yazdığı Nazire  )
 
Hamdülillah kim irişdi yine devrân-ı kerem
Beht ile çıktı şeref tahtına sultân-ı kerem
Yegi şeh-zâdelerün Hazret-i Sultân Mahmûd
Begi âzâdelerün zill-i Hudâ hân-ı kerem
3. Yazılur nâm-ı hümâyûnı ile defter-i cûd
Okınur hulk-ı şerîfi ile destân-ı kerem
Tab’una cûd u sehâ şöyle yakışdı ki gören
Dise olur ki atâ dînidür îmân-ı kerem
Dir dimez Hâtem-i Tayy defterini dürdi cihân
Şehriyâr adına okumalı dîvân-ı kerem
6. Zer ü yâkût bağışlar gülerek gül gibi
Habbezâ bağ-ı cihân içre gülistân-ı kerem
Meclisine nice gülşen dimesün her kişi
Her nefesde açılur gonca-i handân-ı kerem
Tâ huzûr ile ide halk ferâgat hâbın
Yağdurur ebr-i kefi âleme bârân-ı kerem
9. İşiğine yüz uranlar ebedî kalmak için
Silsile lutf-ı demâdemdür ü zindân kerem
İşiğinden ne aceb dirlik umarsa âlem
Ki kapun toprağıdur Çeşme-i Hayvân-ı kerem
Bahr acır kan iniler ebr-i bahârî ağlar
Meclisin devr edicek sâğar-ı handân-ı kerem
12. Göricek taht-ı şerefde seni Belkîs-ı cihân
Didi uş mühr-i sehâ ile Süleymân-ı kerem
Bir sarâyun beğisin devlet ile Şâhâ kim
Hâdimi cûd u sehâ ile Süleymân-ı kerem
Gayrı şehler kereminden eger ihsân ideler
Sen idersin bu cihân halkına ihsân-ı kerem
15. Nûr-ı re’yün var iken mihre ziyâ-bahş dime
Her hasîse kerem it eyleme bühtân-ı kerem
Halka gibi dolanur dâ’iresin halk-ı cihân
Devletün sofrasına zeyn olalı hân-ı kerem
Ger sitârem var ise halkası olam didi çarh
İşiğinde yayıcak sofra-i ihsân-ı kerem
18. Husrevâ sen güneşün terbiyeti ile verir
Bu kadar la‘li vü bu denlü zeri kân-ı kerem
Eğer olmazsa Şehâ ebr-i kefünden himmet
Kanda bulurdı bu gevherleri ummân-ı kerem
Döndi ol devr ki bin hüzn ile erbâb-ı kemâl
Âhidüp dirler idi n’oldı sehâ kanı kerem
21. Uşda kapun felekinden gece gündüz lâmi‘
Meh-i tâbân-ı sehâ mihr-i dırahşân-ı kerem
Nite kim encüm ile zeyn ola bu tâk-ı kebûd
Zer-i ihsânun ile nakş ola eyvân-ı kerem
Dinle güftârunı lutfit ki Necâtî benden
Bülbül-i bâğ-ı atâ oldı senâ-hân-ı kerem
24. Serverâ sarsar-ı gamdan söyinür câm-ı murâd
Dest-gîr olmaz olursa ana dâmân-ı kerem
Ben esîrün sitemi dehrden âzâd eyle
Ben gedâya nazar it lutf ile sultân-ı kerem
İtme bünyâd-ı cefâ âdet iken lutf u vefâ
Eyleme meyl-i sitem var-iken imkân-ı kerem
27 Mücrim ü âsî isem lutf ile rahmet yaraşur
Pâdişâhum çün olur afv-ı günâh şân-ı kerem
Zerre kimdür ki sala hâtır-ı hûrşîde gubâr
Katreden telh ola mı bahr-i firâvân-ı kerem
Nice cûş itse deniz taşraya salmaz güheri
Sürme hışm ile kapudan beni ummân-ı kerem
30. Pâdişâhâ nice bir rûze-i fakr ile geçem
Iyd-ı işret günidür iy meh-i tâbân-ı kerem
 Nice kim âlem ola ıyd-ı hümâyûn ile şâd
Nice kim âdem ola tâbi’-i fermân-ı kerem
Giceni kadr ü günün ıyd ide Sübhân-ı Kadîm
Görelim taht-ı şerefde seni Hakân-ı kerem