111
Fâ‘ilâtün Fâ‘ilâtün Fâ‘ilâtün Fâ‘ilün
 
1 Katlüme geldi dilâ ol yüzi gül-fâmum benüm
‘Îd-i kurbândur begüm irişdi bayrâmum benüm
2 Gûyiyâ bir perçemi sırma sanemdür sîm-ten
Şem-i bezm-ârâ durur serv-i gül-endâmum benüm
3 Her n’olursa zâhidâ soñra serencâmum görem
Sâkî-i gül-çihre olsun tek süren câmum benüm
4 Düşmişem gözden kulakdan nâlem işitmez o gül
Bir nazar kılmaz baña ol çeşm-i bâdâmum benüm
5 Kaşuñ ile gözlerüñ sun‘-i Hüdâdur dostum
Anlara meyl itdügümçün Sun‘îdür nâmum benüm
 
 
YRD. DOÇ. DR. HALİL İBRAHİM YAKAR, GELİBOLULU SUN‘Î DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3197 KÜLTÜR ESERLERİ, Gaziantep