136
Fâ‘ilâtün Fâ‘ilâtün Fâ‘ilâtün Fâ‘ilün
1 Kaşlaruñ zerd olsa n’ola ey yanagı ergavân
Şehlere ‘âdetdür altun tozlu olmak çün kemân
2 Mâh-ı nev hüsn göginde anuñ içün zer düzer
Ya berât-ı hüsnine altunla yazıldı nişân
3 Dimesün kimse gözüñ üstinde kaşuñ var diyü
Kaşlaruñ kazıtduñ anuñ yirüdür Dâstân
4 Bir kalender dilberi kaşın tırâş itmiş didüm
Şimdi olduñ sen hilâl-ebrû dahî ey nev-cuvân
5 Şu‘le-i şem‘-i ruhuñdur görinen kaşuñ degül
Bâd-ı âhumdan egildi ey boyı serv-i revân
6 Alnuñuñ nûrından anuñ fark olınmaz karası
Saru saçuñ arasında yâhud olmışdur nihân
7 Bâd-ı âhum ‘âlemi tozutdı hattuñ ireli
Kaplamışdur tozı kaşuñ yayın ey şâh-ı cihân
8 Günde yatmakdan degüldür hep hatuñdandur senüñ
Berg-i sebz idi sarardı ireli vakt-i hazân
9 Gözleri cellâdı tîgine yâhud altun niyâm
Sâgar-ı zerdür ya içmege şarâb-ı ergavân
10 Hüsn topın oynamag içün ya zer çevgândır
Yâ hayâl itmekde Sun‘i tab‘ın eyler imtihân
YRD. DOÇ. DR. HALİL İBRAHİM YAKAR, GELİBOLULU SUN‘Î DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3197 KÜLTÜR ESERLERİ, Gaziantep
