Ķaśide-yi Źātį DernaǾt-ı Sulŧān-ı Enbiyā Ĥażret-i Muĥammed Śallallāhu TeǾālā
ǾAleyhi ve Sellem
MefǾūlü / MefāǾįlü / MefāǾįlü / FeǾūlün
1. İdüp seherüñ sįne-yi sįmįnini kāġıd
Altun ķalemiyle bunı yazardı Ǿuŧārid
2. Cehd ile dürüş ile kemālātı mükemmel
Yā Ǿizzet ü devlet ķapuña ola müsāǾid
3. Düş baĥr-i Ǿulūm içine Ǿālem śadefinde
Bir gevher-i yekdāne ide tā seni vāĥid
4. Var gevher-i Ǿilmile yüri gevherüñ artur
Altūn it işüñ eyleme bāzāruñı kāsid
5. Seyr it ķamu seyyāre ile cümle burūcı
Aç gözüñi ol ĥikmet-i Ĥaķķı müteraśśıd
6. Senden ulular sözlerini vird idinirsüñ
TabǾıña niçe dürr-i meǾānį ola vārid
7. İsterseñ ide Ǿizzetüñi Tañrı ziyāde
MaǾķūlı ķabūl eyle śaķın olma muǾānid
8. Ĥikmetde ķamu derde şifā ola kelāmuñ
Ķanūnile ķıl manŧıķuñı gözle ķavāǾid
9. Teǿŝįr ide ger saña kelām-ı mütekellim
Zihnüñde vü ķalbüñde ola pāk-ı Ǿaķāįd
10. Bir niçe delįlile Ĥaķuñ birligüñi bil
Şol śūfi-yi sālūs gibi olma muķallid
11. Üç maǾna ile çār varaķ üzre ŧoķūz cild
Olmaġa sebep n’oldı vü kim oldı mücellid
12. Cūş itdi yem-i śunǾ-ı Ħudā Ǿışķ elinden
İbdāǾa sebep oldı şeh-i cümle muvaĥĥid
13. Maĥbūb-ı Ħudā faħr-i cihān şāh-ı risālet
Sulŧān-ı nübüvvet ser-i ser-cümle-yi Ǿābid
14. Bir dem üzerinden ki ese şefķati bādı
ǾĀśįleri yaķmaya cehennem ola bārid
15. Śad bār taĥiyyāt u selām ol mehe her dem
Kim oldı ŧulūǾ itdügi dem şevķile sācid
16. Seccādesini eyledi bir māh müşerref
Kim ħalķa ayaġı yeri miĥrāb-ı mesācid
17. Deryā-yı Ǿaŧā baĥr-i bedenden mütereşşiĥ
Yāķūt-ı seħā kān-ı kefinden mütevellid
18. ǾĀlemde bu gün devlet anuñ şāhid-i Ǿizzet
Yüz şįve ile śaldı revān boynına sāǾid
19. Emr itse ider ŧaşile ŧopraķ ĥarekātı
Aķar śu eser yel ola nehy eylese rākid
[19b] 20. ǾAdli yeli araya girüp eylese ıślāĥ
Birbiri ile āteş ü āb olmaz idi żıd
21. Anda dü cihān naķş-ı Ǿıyān olsa Ǿaceb mi
Āyine-yi śāf eyledi vicdānuñı Vāĥid
22. Şol śūrete kim terbiyetüñ ābı śaçıldı
Śanma ki anuñ dįde-yi baħtı ola rāķıd
23. Ucdan uca dünyāyı eger kim ŧuta āteş
Bir ķaŧre ķadar şefķatüñ ābı ide ħāmid
24. İrse maŧar-ı perverişüñ sebze-yi Ǿömre
Ol mezraǾ-ı dihkān-ı duhūr olmaya ĥāśıd
25. Olmaya vilāyetde anuñ hįç nažįri
Her kim ki senüñ himmetüñi idine mürşid
26. İrerdi ĥayāt ābına hep Ħıżr u Sikender
Ger Ħıżr-ı duǾāñ olmış olaydı aña rāhid
27. Olmazdı Ǿadū zaħmı ile üştür-i Śāliĥ
Ĥıfžuñ eli olsaydı eger kim aña ķāǿid
28. İşitse eger heybetinüñ śıyt u śadāsın
Çarħ üzre o dem Ǿasker-i pervįn ola şārid
29. Bir kimse gelüp itmeden önüñde tekellüm
EvżāǾı olur śıdķına vü kiźbine şāhid
30. Bir anda egerçi on iki burcı ider seyr
Māh olmadı yā Ǿazm-i serįǾüñ gibi ĥāmid
31. Ger kuĥl idine gerd-i rehüñ çeşmine aǾmā
ǾAynile ola Ǿālem-i esrārı müşāhid
32. İtmiş kerem ü luŧfdan icād-ı vücūduñ
Ħalķ eyleyicek ħalķı yed-i śunǾıla mūcid
33. Fāķā düşürür mürġ-śıfat
Ger luŧfuñ irişse ola fāķını fāķıd
34. Şerĥ olmaya ey kān-ı kerem vaśf-ı Ĥamįdüñ
Yazsa şuǾarā ĥaşre dek eşǾār u ķaśāyid
35. Źillet yüzini görmez idi Źāti-yi dervįş
Devlet gibi ķapuñda olaydı müteķāǾid
36. Bįmār u żaǾįf itdi anı derd-i meźellet
Luŧfuñ k’ola Ǿāyid aña śıĥĥat ola Ǿāyid
37. Gözini diküp gūya yatur çāh-ı belāda
Seyyāre-yi eltāfuñı yüz şevķile rāśıd
38. Bįşübhe irer şāhid-i maķśuda ŧapuñdan
Her kim ki duǾā eylemege ola mücāhid
39. Eflāk dönüp ķuŧb-ı ķarār eyledügünce
Evrāķına çarħuñ yaza bu beyti Ǿuŧārid
40. Üstüñe döne ķuŧb gibi cümle felekler
Ĥaķ devr-i zamān içre ide Ǿömrüñi ħālid
Mustafa Atila, NU’ÛT-I NEBEVİYYE MECMÛASI, Dicle Üniversitesi Sosyal Bilimler Enstitüsü ,Yüksek Lisans Tezi Diyarbakır 2012
