KASİDE
Mef‘ûlü/ Fâ‘ilâtü/ Mefâîlü/ Fâ‘ilün
Yâ hâteme’n-nübüvvete yâ eşrefe’l-enâm
Ente’l-lezî tahaşşu‘u fî bâbihi’l-izâm*
Vird-i hadîs-i hüsnüke fî el-sun‘i’l-verâ
Kühl-ı turâbi riclike fî u‘yûni’l-enâm**
Hassaste bi’l-mekârümi min-zümreti’r-rusul
Yâ men-lehü’ş-şefâ‘atü fî-sâ‘ati’l-kıyâm***
Sen ol hızâne hâtemisin kim senüñle Hak
Urdı der-i nübüvvete hoş mühr-i ihtitâm
5 Ben bildigüm budur ki kemâlât-ı enbiyâ
Hatm oldı cümle sende eyâ tayyibü’l-hıtâm****
İtdiyse hâtemiyle Süleymân cihâna hükm
Sen kılduñ iki ‘âlemi bir dâne mühre râm
Kendü şehâdet itdi Hudâ mu‘cizâtuña
Sâbitdür âyetiyle enâm içre bu kelâm
Kur’ân senüñ kemâlüñe âyât-ı beyyinât
Zîrâ beşer dimiş degül anuñ gibi kelâm
Dîn-i cedîdüñ ol yeñi zer-befte döndi kim
Oldı tırâz kim dırâzı anuñ devâm
10 Yakduñ tarîk-ı hakda hidâyet meşâ‘ilin
Mahv eyledüñ dalâli nitekim güneş zalâm
Dürr-i yetîmisin sadef-i bahr-ı rahmetüñ
N’ola senüñle bulsa şeref hâr intizâm
A‘dâ ne ta‘n ider saña cevher ki hâs ola
Noksân gelür mi kıymetini bilmese ‘avâm
Şemşîr-i kahr-ı Hakk’a siper virdi gerdenin
Meydân-ı da‘vetüñde senüñle iden hısâm
Hançer gibi yanuñda şu kim iki yüzlüdür
Yarın yüzi kararsa gerek nitekim niyâm
15 Çeşmüñ riyâzetiyle hilâl idi gerçi kim
Burc-ı hevâda tal‘atuñ olmışdı bedr-i tâm
Niçe baka bu fânî cenâbına ol hümâ
‘Ankâya ‘ankebût idi ey dil olur mı dâm
Dünyâ kelâmını n’ola agzına almasa
Olmaz ‘alef melâ’ike-i kurbete hıtâm
Şîrîn şeker gıdâlıga cânlar virürken ol
Eylerdi hall-i hâmız u nân-ı ceve idâm
Konmışdı sanki surhile levh-i fesâhate
Bir nokta idi ol dehen-i teng ü la‘l-fâm
20 Ka’be yüzüñde kim Hacerü’l-Esved oldı hat
Rif‘at degül mi şâne anı itdi istilâm
Biñ nakş ile öñüñde zemîne yüz urmaga
Mihrâbuñ oldı ümmetüñe hüccet-i temâm
Çâk olmaz idi çihresi terk-i edeb idüp
Hüsnüñle bahse girmese mâh-ı felek-makâm
‘Âlemde var mı kâkül-i hoş-bûyuña nazîr
Bir hûn-ı puhte misk-i Huten ‘anber ise hâm
Ey şeh gulâm-ı kâmet-i mevzûnuñ olmasa
Âzâdelerden olmaz idi serv-i hoş-hırâm
25 Bende kılur cihânı şu şâh-ı zamâne kim
Âsâr-ı haşmetüñde ide kesb-i ihtişâm
Şol kim kapuñda başını taşrın dirîg ide
Bulsun hayât-ı bünyesi pâyinde inhidâm
Ol göz cihânda çihre-i maksûdı görmedi
K’anda hayâlüñ eylememiş ola irtisâm
Bu iki gözlerüm dil-i hûnînile benüm
Oldı şeh-i hayâlüñe bir iki üç hıyâm
Mi‘mâr-ı ‘ışkuñ irmese nekbet konar sere
Vîrâne kalsa mesken olur bûm-ı şûma bâm
30 Oldı elümde ‘urve-i vuskâ*
mahabbetüñ
Allâh oñara bulmaya yol aña infisâm
Sen sakla dilde mihrini yâ Rab zevâlden
K’ol nûrdur bu merhalede reh-ber-i hiyâm
Bir dem menâm-ı rü’yetiñe irişenlere
‘Ömr-i hezâr-sâleden efdaldür ol menâm
Ru’yâ-yı rûh-bahşuña eyâ ne vakt ire
Bir dîde kim bu şevkıle aglaya subh u şâm
Esrâ’** düninde muştuladı saña Cebre’îl
Kim subh-ı vasla da‘vet ider hayy-i lâ-yenâm
35 Destüñdedür ‘inânı Burâk-ı sa‘âdetüñ
Ey şeh-suvâr-ı ‘arsa-i erbâb-ı ihtirâm
Ervâh-ı enbiyâya eyâ kıblegâh-ı Kuds
Hoş mekrümet degül mi ki sen olasın imâm
Levlâke*** hıl‘atin giyene olmaya ba‘îd
Heft âsmânı gün gibi seyr itse şâd-kâm
Bezm-i ezelde tahtuñ idi çün makâm-ı kurb
Ey şeh senüñle buldı şeref yine ol makâm
Nâm-ı mübâreküñ dil ü cân ile zikr iden
Yazıldı sadr-ı defter-i ‘izzetde nîk-nâm
40 Çarh-ı hidâyet üzre nücûm oldı her biri
Nûruñdan iktibâs idüben zümre-i kirâm
Sıddîk’a nîş-i ‘ibreti nûş-ı mahabbetüñ
Gâr içre eyledi nitekim sükkeri ta‘âm
Fârûk’ı dahı terbiyetüñdür kılan senüñ
‘Adliyle zulm zehrine tiryâk-ı intikâm
Âfâkı tutdı gün gibi nûr-ı sâhibi
Senden urınmagıle edeb tâcın ey hümâm
Hayder götürdi mest olıban bâb-ı Hayber’i
Bezm-i şecâ‘atüñde senüñ çünki içdi câm
45 Olup sakîl-i saykal-ı himmet Hasan Hüseyn
Birlikde nitekim çalışdılar iki hüsâm190
‘Âlî menâkıbın eger âl u sahâbeñüñ
Elfâz ihâta eylese eylerdüm ihtimâm
Tâ-haşr olınca cümle senüñ rûh-ı pâkine
Biñ biñ tahiyyatile salât ola ve’s-selâm
‘Âlemde senden istedigüm budur ey şefî‘
Hâk-ı tazarru‘a koyuban rûy-ı iltiyâm
Unutma buñ deminde Behiştî hakîrüñi
Görme revâ ki kaldı ‘azâb içre müstedâm
50 Lâzım olupdur aña inâyetler idesin
Mücrimlerüñ halâsını çün itdüñ iltizâm
Gayrı kapudan istemez ol ber-murâd ola
İster şefâ‘atüñle bula dü cihânda kâm
Bakma efendi zâhiri oldugına harâb
Vallâhi cân u dilden olupdur saña gulâm
Dr. Yaşar AYDEMİR, BEHİŞTÎ DÎVÂNI, https://ekitap.kulturturizm.gov.tr/Eklenti/10597,behistipdf.pdf?0
