Kasîde Der-Sitâyiş-i Vezîr-i a‘zam İbrahîm Pâşâ
Berâ-yı Teşekkür-i Medrese
 
1. Hoşâ ey feyz-i cûdun eyleyüp zîbende dünyâyı
Kemâl-i lutfun etdi hissemend a‘lâ vü ednâyı
2. Hoşâ ey mesned-ârâ-yı himem ki hüsn-i tedbîrin
52
Edüp mülk-i cihandan ber-taraf âşûb u gavgâyı
3. O gavgânın yerine kıldı dest-i bezl-i ihsânın
Cihanda her kese bir gûne lutf-ı râhat-efzâyî
4. Budur hakk-ı kelâm ey sadr-ı zî-şan kim kıyâs olmaz
Senin eltâfına bezl ü atâ-yı Hâtem-i Tâyî
5. Niçün derlerse cümle müddet-i ömründe ol etmiş
Verüp mâlın biraz eşhâs-ı nâsa bezl ü i‘tâyı
6. Sen ammâ ey hidîv-i muhterem evvel zuhûrunda
Bütün bir memleket halkına kıldın kâm-bahşâyî
7. Edüp halkı yeniden mülk ü mâl ü câhına mâlik
Cihâna eylemişken böyle lutf-ı âlem-ârâyi
8. Bu lutf-ı şâmil ile eylemişken gamdan âzâde
Kemâl-i re'fetin bây u gedâyı pîr ü bernâyı
9. Yine her birine mahsûs edüp in‘âm haddince
Nevâzişlerle memnûn eyledin a‘lâ vü ednâyı
10. Aceb tevfîka makrûn oldun ey sadr-ı kerem-güster
Ki sana Hak müyesser kıldı böyle nâm-ı vâlâyı
11. Cihan nâmınla doldu halk ihsânınla sîr oldu
Tarâvet buldu eltâfınla bu mülkün ser-â-pâyı
12. Zamân-ı devletinde Hazret-i Allaha şükr olsun
Belâsın buldu baht-ı bî-vefâ gerdûn-ı hercâyî
13. Hele el-hamdülillah baht-ı ser-keş bildi yâ haddin
Hele kâfir felek de çekdi yâ dâmânına pâyi
14. Demişdim ben kulun tenhâca bir kaç def‘a gerdûna
Behey zâlim nedir bu hâtır-âzârî vü hod-râyi
15. Neden tâ böyle düşmüşsün sen erbâb-ı ma‘ârifle
Biraz da etsene der-pîş-i âyîn-i müdârâyı
16. Tutalım sende şefkat yoğ imiş kâdir misin men‘e
Gürûh-ı ehl-i dânişden zuhûr-ı lutf-ı Mevlâyı
17. Ya havf etmez misin kim eyleye Hak âleme düstûr
53
Kemâl ü ma‘rifet kadrin bilir bir sadr-ı dânâyı
18. Hudâvendâ bana şimdi peyâmı geldi gerdûnun
Demiş kim ey çerâğ-ı dûdmân-ı nükte-pîrâyî
19. O sözler kim demişdin bana oldu cümlesi zâhir
Vezîr etdikde Sultân Ahmed İbrahîm Pâşâyı
20. Cenâb-ı Âsaf-ı zî-şan ki anlar rütbe-i kadrin
Gören dâmân-ı lutf u re'fetinde dest-i Dârâyı
21. Cenâb-ı Âsaf-ı âlî-himem kim âşiyân etmiş
Hümâ-yı baht dergâhındaki tâk-ı felek-sâyı
22. Bilir kim bir keşîde rahşdır ıstabl-ı hâsında
Meh-i nev gören çarhın kefelgâhında tamgayı
23. Bilir kim bir çekîde katredir deryâ-yı cûdundan
Gören enfâs-ı bâd-ı subh ile cûşende deryâyı
24. Mükerrem sıhr-ı sultân-ı cihan kim vakt-i sûrunda
Sipihr-i atlas ihdâ eyledi bir tûp dârâyı
25. Edüp ammâ ki sonra şerm-i vâfir i‘tizâr etdi
Görüp çâvûşunun dûşundaki zîbende kemhâyı
26. Gelüp bir gûne rû-mâl eylemiş kim seyreden âdem
Süm-i esbinde mîh-i zer kıyâs eyler süreyyâyı
27. Varup bir tarz ile vaz‘-ı cebîn etmiş ki râhında
Nişân-ı na‘l zann etdim hilâl-i mâh-ı garrâyı
28. Ne bulmuş Rüstem-i Kâvûsdan Firdevsî-i Tûsî
Ne görmüşdür bir iki Türkden Vassâf-ı sevdâyî
29. Der-i vâlâsına varsın da görsün haşmet ü câhı
Gelüp âlâyını görsün de seyr etsin temâşâyı
30. Hudâvendâ mekârim-perverâ sadr-ı cihân-ârâ
Hudâ sensiz bize göstermesin ol sadr-ı a‘lâyı
31. Cenâb-ı hazretin devletle ol sadrı edüp teşrîf
Edelden emn ile âsûde tedbîrin berâyâyı
32. Du‘â-yı izz ü câhın zimmetimde farz bilmişdim
54
Ederdim rûz u şeb medhinle meclislerde gûyâyî
33. Bu def‘a bir kerem de eyledin kim âcizim el-hak
Ne denlü eylesem ihsânının vasfında ıtrâyı
34. Beni ihyâ kılup feyz-i dem-i can-bahş-ı lutfunla
Nümâyân eyledin âsâr-ı enfâs-ı Mesîhâyı
35. Çerâğ etdin beni dâ'im senin de ey kerîmü'ş-şân
Çerâğın rûşen etsin dîde-i mihr-i mücellâyı
36. Hele ol dergeh-i iclâline bir hidmetim geçse
Bu lutfun böyle hayrân eylemezdi cân-ı şeydâyı
37. Diyâr-ı âhara gitdikde hattâ ben kulun her dem
Ederdim dilde pinhan kendi zu'mumca bu da‘vâyı
38. Ki gerçi matlabım va‘d etdi ol sadr-ı kerem-güster
Husûl-ı kâma kıldı gûşe-i ebrûsu îmâyı
39. Velîkin bunca eşgâl-ı umûr-ı saltanat varken
Nice der-hâtır eyler ben gibi bir bî-ser ü pâyı
40. Pes etdim azm kim ol dergeh-i cûda edüp rû-mâl
Kılam peyvend-i dâmân-ı kerem dest-i temennâyı
41. Kaçan geldim der-i ikbâle ol dem dest-i ihsânın
Kef-i nâ-kâmıma sundu ru'ûs-ı sîm-sîmâyı
42. Alup bûs eyleyüp baş üzre koydum şükr edüp bin kez
Tamâm oldu işim bahtımdan etmem gayri şekvâyı
43. Budur dergâha şimdi arz-ı hâl-i bende-i nâ-çîz
Ki ey sadr-ı güzîn ey müttekâ-pîrâ-yı Dârâyî
44. Çerâğ oldukda yine gitmek üzre eylemişdim ahd
Der-i ikbâline etdikde kasd-ı çehre-fersâyî
45. Bi-hamdillah ki oldum devletinde matlaba nâ’il
Çerâğ etdin inâyetle Nedîm-i zâr-ı şeydâyı
46. Ne vech sudûr eyler efendim şimdi fermânın
Derinden dûr olup kılsın mı benden râh-peymâyî
47. Veliyy-i ni‘metim ümmîdgâhımsın efendimsin
55
Nedir emrin buyur ey zîb-i sadr-ı kâr-fermâyî
48. Hemîşe tâ kumâş-ı zer-keş-i vasf-ı keremkârın
Ede lebrîz-i revnak destgâh-ı şi‘r ü inşâyı
49. Yazup vasf-ı şerîfin zer-kalemle mihr-i ferruh-fer
Kıla pür-zîb ü zîver safha-i çarh-ı mu‘allâyı
50. Kılup zât-ı şerîfin mesned-i d………
 
 
Prof.Dr. Muhsin Macit, NEDÎM DİVÂNI, KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3371