[384]
Mefâ`îlün Mefâ`îlün Mefâ`îlün Mefâ`îlün
1 Kalur mı sâkî böyle bezme câm-ı bâde gelmez mi
Gider mi duhter-i rez `âşık-ı nâ-şâde gelmez mi
2 Bulınmaz zevk-i hâlet-bahş-ı mestî ehl-i meclisde
Yetişmez mi `aceb pîr-i mugan irşâde gelmez mi
3 Gül-i câm-ı safâ gülzâr-ı bezm içre açılmaz mı
Kanı yâ `andelîb-i çeng ü mey feryâde gelmez mi
4 Der-i `işret-sarây-ı Cem küşâde olma mı gayrı
Esîr-i bend-i gam yine gidüp âzâde gelmez mi
5 Yatar humlar tehî hum-hâneler tenhâ niçün bilsem
Kanı mestâneler sürdükleri dem yâde gelmez mi
6 Harâb olmış bozılmış resm-i âyîn-i tarab-hâne
Harâbât erleri n`oldı anı âbâde gelmez mi
7 Felek cevrini Nâmî âh terk itmez mi ehl-i dil
Kalur mı böyle bir dâver serîr-i dâde gelmez mi
Yard. Doç. Dr. Ahmet YENİKALE AHMET NÂMÎ DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ
