151.
. . - - / . . - - / . . - - / . . –
1.Kademin öpmek içün kaddümüzi lâm idelüm
El virelüm bile şâyed hele ikdâm idelüm
2.Savm-ı hicrân ile bir dil-beri da‘vet kılalum
Gelüñüz cem‘ olalum bir yire bayrâm idelüm
3.Her ne hâl ise seg-i kûyuñuñ öñince kaçup
Kendümüzden uluya ‘izzet ü ikrâm idelüm
4.Dâne yok sayd ola mı hîç o hümâ-pervâzum
Tutalum rişte-i cândan aña bir dâm idelüm
5.İtmedi nâlişümüz yâre ‘Atâyî te’sîr
Çünki râm idemedük nice bir ibrâm idelüm
Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994
