Murabba’
 
 [Fâ’ilâtün Fâ’ilâtün Fâ’ilün]
− · − − / − · − − / − · −
 -I-
İy yañagı âfitâb alnı kamer
İy cemâl ü hüsnle nûr-ı basar
 Baña lutf it gözüm nûrı peser
 Rahm idüb şefkat yüzinden kıl nazar
 -II-
İy benüm ma’şûk-ı cânum ‘âşıka
Şol senüñ ‘aşkuñ yolında sâdıka
 Senden ol ihsân u lutfa lâyıka
 Rahm idüb şefkat yüzinden kıl nazar
1213
 -III-
 Ben kuluña iy güzeller serveri
İy güzeller cem’inüñ ser-defteri
İy kamu güzellerüñ tâc-ı seri
 Rahm idüb şefkat yüzinden kıl nazar
 -IV-
 Hây efendi lutf idüb ben kuluña
 Ben du’â-yı devlete meşgûluña
 Mâ-hasal ben bende-i ma’zûlüñe
 Rahm idüb şefkat yüzinden kıl nazar
 -V-
 Hây efendi gel bu Nazmî bendeñe
Şol yoluñda hâk olan efkendeñe
 Hey gülüm ol bülbül-i nâlânuña
 Rahm idüb şefkat yüzinden kıl nazar
 
Yrd. Doç. Dr. Sibel ÜST, EDİRNELİ NAZMÎ DÎVÂNI (İNCELEME-METİN) T. C. KÜLTÜR VE TURİZM BAKANLIĞI, 2012 www.kulturturizm.gov.tr