Gazel
 
İy kemân-ebrû n’ola kurbân idersem cân sana
Bin benüm bigi ider her lahza cân kurbân sana
 
Mihrüni cânda ezelden saklar idüm sanma kim
Dâr-ı dünyâda görüp hayrân olupdur cân sana
 
Dilde gamzen zahmına merhem didüm dil-ber didi
Tîr-i müjgânum yeter her lahzada dermân sana
 
Pertev-i hüsnün meger eflâke düşmiş ay u gün
Gice gündüz raks urup olmış durur hayrân sana
 
Hûblık sende temâm olduğına huccet durur
Kâtib-i kudret ki yazmış ol hat-ı reyhân sana
 
Bil hemân ben dimezem aduna şeytân iy rakîb
Bunca çok telbîs ile her kişi dir şeytân sana
 
Hûn-ı dil yaşunla Adlî gerçi seyl oldı dirîğ
Kanlu yaşun göricek rahm eylemez cânân sana
 
Bayram, Yavuz (2009). Amasya’ya Vâlî Osmanlı’ya Pâdişâh Bir Şair: Adlî (Hayatı, Şahsiyeti, Şairliği, Dîvân’ının Tenkitli ve Orijinal Metni). Amasya: Amasya Valiliği Yay. 185.