45.
- . - - / - . - - / - . - - / - . –
 
1.İrmedi yâre sirişk-i çeşm-i bînâdan haber
 Gerçi sür‘atle varur dirlerdi deryâdan haber
2.Gûş tutsañ ‘âlem-i bâlâ peyâmın diñleseñ
 Zâhidâ virsem saña ol serv-i bâlâdan haber
3.Bülbül-i şûrîdeye gül-berg ile mektûb uçur
 Vâr ise ey bâd-ı gülşen verd-i ra‘nâdan haber
4.Bî-haberdür dahi dünyâdan o tıfl-ı nev-resüm
 Diñlemez gelse eger ‘uşşâk-ı şeydâdan haber
5.Bezm-i yârüñ vasfını itmeñ ‘Atâyî’den su’âl
Mümkin olur mı alınmak mest-i rüsvâdan haber
 
Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994