Mefâ`îlün mefâ`îlün mefâ`îlün mefâ`îlün
1 Irişsün `ıyd olsun bâdeye ruhsat da gör seyri
Kalur mı bir tehî sâgar hilâl-i `ıyddan gayri
2 Niçün terk eylesün mey-hâne küncin rind-i mey-hâre
Ne zâhiddür ne râhib neylesün ol mescid ü deyri
3 Sunar dergâhına kim varsa bir câm-ı hâyât-efzâ
`Aceb devletlüdür pîr-i mugân mebzûldür hayrı
4 Mey-i cân-bahş ile sâgardaki her mürg nakşından
Işitdür sâkiyâ gûş-ı mezâka mantıku't-tayrı
5 Görüp câm-ı habâbı bezm-i meyde anla ey Yahyâ
Tehî olmaz felekler cünbişi seyyâreler seyri
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
