Fâ`ilâtün Fâ`ilâtün Fâ`ilâtün Fâ`ilün
1 Hûn-ı `uşşâk ile pür olsa bu nüh peymâne hep
Nûş ider zannum budur ol gamze-i mestâne hep
2 Katre-i eşküm nigâh-ı seyr-i hüsne virmez öñ
Encüm-âsâ atılur birden ser-i müjgâne hep
3 Gam yime ey dil gelür lutf-ı devâ-yı vasl ider
Derd-i hicrânuñ `ayândur ol tabîb-i câne hep
4 Nicedür tûfânı görsün bir dahı çeşm-i zamân
Bu hurûş ile hele varsun yaşum `ummâne hep
5 Bir şeh-i mesned-nişîn-i mülk-i hüsnüñ dil gibi
Mübtelâ-yı derd-i `ışkı âşinâ bîgâne hep
6 Nakş-ı hüsn-i dil-keşin levh-i dile tasvîr içün
Nakd-i eşkin merdüm-i çeşmüm kodı meydâne hep
7 Halk-ı `âlem bir nigeh-nâz-ı vefâsı lutfına
Muntazırdur Nâmî-âsâ ol şeh-i hûbâne hep
Yard. Doç. Dr. Ahmet YENİKALE AHMET NÂMÎ DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ
