Fâ`ilâtün fâ`ilâtün fâ`ilâtün fâ`ilün
1 Hûblar zânû-be-zânû câm-ı zerrîn der-miyân
Bir gül-i sad-bergdür gûyâ o bezm-i dilsitân
2 Gül dizüp zerrîn kadeh etrâfına bir kâsede
Eyledi erbâb-ı meclis zîynet-i bezm-i cihân
3 Sahn-ı gülzâre virüp revnak gül-i ra`nâ ile
Çevresin rengîn gül-i zîbâ tonatmış bâgbân
4 Rişte-i âla dizer gûyâ nice yâkût-ı nâb
Devr idüp ol meclisi câm-ı şarâb-ı erguvân
5 Gül gül itdi `ârız-ı hûbânı Yahyâ tâb-ı mey
Oldı şem-i meclis-ârâ her taraf pertev-resân
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
